twitter rss

ඒ ඇස්.. ඇස්මය

:::ලිපි වර්ගය:::

අපරිමිත හැඟුම් පොදි
කිටි කිටියේ වෙවුලමින්
කබායට තදවෙද්දි
සුසුම් තව ගුලිවෙද්දි

නිරුත්තර සිහිනයක
ටිකෙන් ටිකෙ මත්වෙද්දි
යෞවනයේ නින්ද්‍රාව
කෙටි කලේ ඇස් දෙකකි

මත් නොවෙන ඇස් අතර
නොනිමි වූ හිත් ගොඩකි
එයින් මගේ හිතත් දැන්
සොයාගැන්මද නොරිසි

තත්පරෙන් පංගුවක්
වසා යලි විවරවූ
ඇස්වලින් කියූ වැකි
පැයක් ගතවී දැනෙති

ඒ පැයට ජීවිතේ 
නතරවූ සේ දැනුණී
යළිඳු පණගන්වන්නට
යතුර ඇස් ලඟම වුණි


(ෂ්..... ඒ ඇස්..ඇස්මයි.. සත්තයි)



හීන සහ හීන

:::ලිපි වර්ගය:::

කලින් කලට වෙනස්වන
හීන ඇත බොහෝ තැන්වල
නැංගුරම්ලා තදකර
ජීවිතය සමග එකම ගමනකට

හිත මත එක එක පැටවෙන
හීනවල බර තදට
දැනෙනවිට තනි හිතට
සැහැල්ලුව කොහෙද උපන් දා සිට

අපිත් එක්කම මරු තුරුලට යන
නූපන් හීනත් පොදි බැඳගෙන
නගිනා හපුතල් කන්ද
තවත් එක් හීනයක් පමණක්ම වෙද

ඔහුට හිමි නුඹෙ පින්තූරය

:::ලිපි වර්ගය:::

 
ඉරහඳ දහසක් මැද - නිල් නුවණ තනිව ඇති
මොහොතකට සිනහා - නොවන දවසක පුදුමැති
ගත්ත නුඹෙ පින්තූරය - අද ඔහුට හිමි
හැඩයට තබාගෙන ඔහු - ලොවට පෙනෙන්නට
නුඹ හිත මෙන්ම - රුවද හිමි බව කියන්නට
 
තදකරන් හුස්ම පොද - ඉඳහිට මමත් ගොස්
බලනවා පින්තූරය - නුඹෙ සුසුම් රැඳී ඇති
ඔහුට හිමි වුනත් අද - නුඹට හිමිවෙලා නැති
 
 
- ජනරඟ විජඉඳු දේවසුරේන්ද්‍ර -
 


වෙන්වයාම

:::ලිපි වර්ගය:::

 
හිත හැදෙන්නට වචනයක් නැති
හිත රිදෙන්නට තවත් ඉඩ නැති
නොනිමි සුසුමන් ගලන මොහොතක
යන්න ගිය මතකයන් නොරැඳිම
වසාලන නෙතු පියන් අතරට
ගොළුවෙලා හද ගැස්මද හොරෙන් මට
අහස්ගැබ දෙස නොබලනා නෙත
මටත් නොදැනිම වැසේ තනියම
 
යන්න ගිය නුඹ නොඑන වග දැන
යන්න යමි මම මතක පොදි බැඳ
 
--------- ජනරඟ විජඉඳු දේවසුරේන්ද්‍ර --------
 


දුහුවිලි කුමරිය

:::ලිපි වර්ගය:::
 
 
සිහිනෙන් සිහිවන
සිනහව හින්දම
නින්දද නොමැතිව
මං අද තනිවම
හුලඟට හුරුනැති
ඉමදිය මංකඩ
නුඹේ සිනා ගෙන
බලා හිඳී අද
 
 


ගං දියට ගිය මිත්තරේ..

:::ලිපි වර්ගය:::


තුන්රෝදෙ උඩ ගෙවන දවසම
ජීවිතය හුරුවෙන්න ඇති
දකින නොදකින මුහුණු අතරෙම
දවස සරිකර ගන්න ඇති

මිතුරු කැල මැද නිවෙන දාහය
යොවුන් සිත පුබුදන්න ඇති
ඉහෙන්,දෙකණින්,මුවින් ගිලිහෙන
යොවුන් පැතුමන් ඉන්න ඇති

හයර් දෙක තුන එකතු කරගෙන
පිලිවෙලක් කරගන්න ඇති
ගෙදර කලඑළි කලේ උඹ බව
සනුහරේ උන් දන්නේ නැති

හීන හිත පෙම මත්තේ හැපි හැපි
නොයෙක් දුක් පොදි දෙන්න ඇති
ඉහිලු අභිමන් යොවුන් පැතුමන් 
පෙමක් පාමුල පොඩි වෙන්න ඇති

මචං තාලෙන් එදත් හංදියේ
පාක් එක ලඟ ඉන්න ඇති
අතට හුරු දිග යතුරු කැරැල්ල
කැරකෙමින් දඟලන්න ඇති

මුවෙහි වූ එක සිනා රැල්ලත්
සැනින් කොහි සැඟවෙන්න ඇති
දෙනෙත් පොඩි කර සුසුම් හෙලමින්
ගංතෙරට නුඹ යන්න ඇති

පොකැට්ටුව හා ජංගමේ නුඹෙ
ගංතෙරේ තනිවෙන්න ඇති
දිගැති හුස්මක් දෙකක් හෙලලා
ගංදියට නුඹ යන්න ඇති

ලපටි කල සිට නිල්වලා ඟග
නුඹෙ පහස හඳුනන්න ඇති
දුකක් හිත තිබු නුඹෙ නිසල් රුව
ඇඟෙ උකුල මත සතපන්න ඇති

(වෙලේවත්ත හංදියේ ත්‍රීවීල් පාක් එකේ නිතර මුණගැහුණ මිත්‍රයා ගංදියට දිවි දුන්නා...ඌ වෙනුවෙන් ලියපු කවි වැල...උඹට නිවන් සුව මචං !)



සළුවඩන්නී

:::ලිපි වර්ගය:::


පාත ඇළ ලඟ රිදී බැම්මේ
ඇහැල ගහ යට හැන්ඳැ වරුවේ
පෙනි පෙනී වෙල් නිල්ල මානේ
නුඹෙ රුවයි ලහි ලහියෙ එන්නේ

කරඹ මල් කැකුලක් අරන්
එහි සුවඳ මුසුවී බලා ඉන්නේ
පොට්ටෙනිය හිස තබාගෙන විත්
ගිමන් හරිනා නුඹේ රුවමයි

දහඩියට නිසි ලංසුවක් නැති
ජීවිතය හරි මගක් දන්නැති
මනුසතුන් මැද දිවිගෙවන්නට
රෙදි ගොඩක් සරණට එන්ට ඇති

අඳින සළු නිසි පාට අගනට
ඔප කරන්නට වරම් ලැබුනට
එවන් සළු නුඹේ ගතේ රැඳුමට
පිනක් නොලදැයි කියමි කෙලෙසක

කුලවතුන්ගේ හිත් හදන්නට
පා මගට බැස නිතර පෑගෙන
මලක් දුටු විට පුරුදු විලසම
මැවෙන්නේ නුඹෙ රුවයි ඒ මත

පව් කලත් සිල් සළුව වැසුනට
ඒ පවත් නුඹෙ අතින් හේදෙන
බවක් ඒ අය දන්නවානම්
පිනක් නොලදත් කමක් නෑ නුඹ

පාත ඇළ ලඟ කිලිටි හෝදන
නුඹට හිමි තැන ලොවම නුදුටුව
හැන්ඳැ වරුවට වගෙම දවසෙම
හිත් පුරා නුඹෙ සළු අඳී හිත





Contentment

:::ලිපි වර්ගය:::

නුඹ විකසිත වන විට
උසම උස අතු මත
වෙලී මම සුවය ලබමි
නුඹ පිපුණ ගසේ මුල

හීන හැන්ඳෑව

:::ලිපි වර්ගය:::

සිනිඳු සුසිනිඳු හදක්වත් නොදන්නා හීන
පණක් කටහඬක් නැති
නලියන්න හිතක් නැති
දඟලන්න ඉඩක් නැති
හැන්ඳෑවකට කොහොම දැනෙයිදෝ

ඉඩක් නැති හදක් තුල
ඉඩක් සොයමින් තැවෙන
හදක් නිති ඉකිබිඳින
බව නොදනී හැන්ඳෑවද


නිසල වීමි

:::ලිපි වර්ගය:::

මා වවුලන් කෑගැසුම
යාන්තමින් ඇහෙන
සීතලක රැයක
තනිකඩව
රියන් හතරේ
සොහොන් ගැබ
නොසොයනා සැඳෑ සුව

පරවි කුමරියක්ව ඔබ
සුදු සේල රැලි අතර
ඔත්පලව වැතිර ඇති
මල් යහනේ මුමුණුවට

කලක් ගතවී නැතත්
මලත් මම තනිකඩය

 

සමනලයින්ගේ සංධ්වනිය

:::ලිපි වර්ගය:::


පුරුදු සුවය නොවුණත් මිහිමත
දැන දැන පිපෙන මල්
පෙරකල සිත්හි වැදී
සුළඟට මුසුවූ සුන්දර සැමරුම්
සිහිනෙන් අවදිවනවා සත්තයි දිනකදී යලිත්
නොමැකෙන්නට ජීවිතයෙන්
හීනයක්ම පමණක් වී

හිරිමල් ස්වරය තවමත් නොහඬන හදින්
අසයි නොයනා දුර සවනේ මානයෙන්
හිතට හිත සැනසූ සොඳුරු රූ අතර
නොමියෙමි නොමියෙමි වසා දෙනුවන්
ඉපදෙන්නට යලිත් නොදුටු හීනය තුලම

හදවතේ ගැස්මක් ගැස්මක් පාසා
නෙතු සැලෙන වාරයක් වාරයක් පාසා
පා තබන පියවරක් පියවරක් පාසා
ආදරෙයි තවමත් නොදුටු හීනයට
තවමත් හිතෙහි පැලපදියම්ව
දිවියම උසුලාගෙන යන






ඇවිදින්න සංසාරයේ

:::ලිපි වර්ගය:::

එන්න යමු අපි ඇවිද
හිත මිතුරු සුළඟ සමග
හමා එන සිප අප ගත සුවය
යමු ඉතින් පිළිගෙන තුටින්

සිත් විඳගත් සැනසුම් පුස්ඹ
නොලද බොහො කලක සිටම
එක හුස්මට පෙම් බැඳි මේ සුවය
තව තව කොහොද හිත සැනසීම මිස


සංසාරය බොහෝ දුරය දැන්
එතෙර වන්නට හිත දිරිය මිස
නොමැත සරණක් අප හිතට
දෙසූ දම් අසා සිත නිවනට

ඇවිදින්න යමු අපි ආයෙත්
සුමට සුමුදු මාවතේ
හිත සුවය නිති රැඳේ
බුදු බණ පදයේ අරුතේ





ජනරග විජඉදු දේවසුරේන්ද්‍ර නිර්මාණයක්